Nel caberu Plenu municipal, l'equipu de gobiernu de la Casa Conceyu de Corvera aprobo de copitu l'estudiu de detalle del Plan Sapu VI de Corvera, o lo que ye lo mesmo, una galmiada pal baltiu del pueblu Truyés.

Ye tan incomprensible l'actitu de los nuesos cabezaleros políticos, comu tosquillona la so política cultural. Ente les llinies quiciabes se puea alcontrar dalgun favor político ensín asolombrar.

Va más d'un añu qu la nuesa agrupación llocal d'Andecha Astur, ta a la gueta de concienciar a esta clas política de lo importante de protexer el nueso padremuñu cultural, padremuñu, ello seya, que pertenez a to@s n@s .

Esti consentimientu de los cabezaleros políticos de Corvera, respeutu les irregularidaes que ta faciendo continumente Dolabay Erma SA ( Grupo Proinasa ), como son el baltiu intencionau d'un llavaderu de factura tradicional protexiu ( informau previamente l'equipu municipal, sin facer un res por ello ), ensin permisos de la CHN no que respeuta al cursu d'agua del regatu Truyés ( denunciau por nos y delles persones, y sancionada la promotora ), corta de viesca autóctono de ríu ( carbayos, lloreos, castañeu, ... ), entrada de maquines nuna fastera protexia arqueolóxicamente, tala de xárdones, amás de munches coses más de tipu social, cultural y mediuambiental, faen que dende les nueses files, camentemos que l'equipu municipal ta actuando toscamente, o meyor camentau, nun ta faciendo nada.

Toos estos fechos, fueron oxetu de despreciu pola parte d'unes persones que gúei gobiernen en Corvera, y que nel so programa elleitoral camentaben “ la proteición del padremuñu de Corvera “ como un de los sos entamos . Estes, son les mesmes persones, que tan a la gueta de “ tirar abaxu “ un pueblo con más de 2000 años de hestoría.
Y nun ye que lo camentamos nos talamente, tamién dende dixebraes organizacones vecinales, politiques, culturales y medioambientales que camenten lo mesmo. Tamién l'ALLA pidí'l respetu la toponimia del llugar, amás de la Conseyería de Cultura que nun dictamen del Serviciu Permanente de Padremuñu Cultural aconseya a la Casa Conceyu Corvera qu'ameste'l núcleo rural de Truyés dientro los Catálogos urbanísticos de proteición de bienes inmuebles ( un rangu de proteición cultural a nivel de conceyu ) dientru la disposición transitoria 3ª de la llei 1/2001 de Padremuñu Cultural del PAA.

Pa finar, y comu puntu caberu, l'informe de la CUOTA respeutu al Plan Sapu VI de Truyés , aconseya a la Casa Conceyu Corvera “ conservar y si ye posible remocicar el núcleo del pueblu Truyés, d'alcuerdu l'area dotacional que les pertenez dientru'l campu golf “, esto ye, pa finar, fae responsable a la Casa Conceyu de la conservación y posible remocique del pueblu de Truyés.

Polo tantu, si dempués de toles afirmaciones y camentamientos nun tienen nidia la conservación del pueblu Truyës, del padremuñu cultural que representa pal esfrute de tol@s corveran@s , y nun faen valor por lo que tienen y puen facer por ello, lo meyor ye la renuncia al Plan de dinamización turística ( nun tan pola llabor de defender el nuesu padremuñu cultural, ya que nun se puer presentar al turista pueblos baltiaos y horros esfarraplaos ), a la so probetaya política cultural ( privatización la Escuela de Música, nenguna partida presupuestaria pal remocique d'inmuebles protexios, intentu d'escaecer la foguera de San Xuan, al querer camudar el so sitiu, ... ) y a tolo que conlleve la proteición y conservación de la nuesa hestoría, ya que de consumarse'l baltiu déstí pueblu, se dira al mesmu tiempu un cachu de Corvera, y poro tantu una parte de nós mesmos.

Al equipu municipal , dende Andecha Astur de Corvera pidimos una enerxica rempuesta no que respeuta a la proteición d'estí pueblu, ya que agúeyau lo enrriba indicau, too ye cuestión de voluntá política, daque falando d'aspeutos culturales y sociales, rescampla pola so ausencia.

Xosé Xicu Mata ye Coordinador d'Andecha Astur de Corvera.