|
Atoupánonse
restos del achelense ya outros de despuéis qu'acreditan el
pasu d'aborixes muito anantias de la chegada de las tribus
indoeuropeas, ou de los asentamientos de los pésicos, qu'eiquí
alcontranon, (xunto conos castros), los romanos. Estos últimos
esplotanon la bayura minera ya inda se caltienen restos de las
esplotaciones auríferas que touvienon particular importancia
nas zonas de Navelgas
ya Zarréu. D'aquel.la dómina vien la primer rede viaria
(ya en bona parte inda se caltién, incluyida la ruta xacobea
del medievu), nacida al empar que se fomentaba la minería
ya'l movimientu comercial de dalgunos produtos como'l l.linu,
el granu ya los asturcones. L'alcuentru d'aras, l.lábanas
votivas, estelas mortoiras, barbacanas ya outros importantes
vestixos, falan de la importancia de la colonización
romana nos cinco sieglos qu'eiquí touvienon. Sobro un
vieyu castru l.levantanon los romanos la civitas, con
fortaleza ya centru alministrativu, precursora de la vil.la
medieval de Tinéu que, en 1222, el Rei Alfonsu IX cita nun
documentu entitulándola "mi pobla" ya afitando
asina'l sou fueru de "pobla real" muito anantias
d'algamalu las mas de las asturianas que despuéis lo
consiguienon. Nu anu 780 yera fundáu'l Monesteriu
d'Oubona pol príncipe Adelgaster, presuntu fíu
natural ("con fame de ganancia") del Rei Silu.El
documentu que tresmite la noticia ía indubiablemente
falsu, magar que la fundación d'Oubona foi cuase de xuru de
mui antigu. N'escrituras de fines del sieglu X fálase de
donaciones "in comiso de Tinegio"; ya de data de 24
d'outubre de 912 ia la escritura de donación por Fruela, fíu
d'Alfonsu III, de nuove ilesias (ente el.las las de Mañores,
Ponte, La Barca, Tabláu...) ya un monesteriu ( el de Sobráu
) a la d´Uviéu.
|
Nu anu 937 fúndase'l
monesteriu de San
Miguel de Barzana; ya nu sieglu XI configúrase claramente'l
"comisso de Tinegio", ya ia de 1109 el testamientu de
Petrus Alvariz ya la sua muyer, confirmando a los
"imperantes Tinegio", pais del primeiru monarca
pertués Alfonsu Enriquez. Representantes de Tinéu van en 1115
a la Xunta que n'Uviéu fai l'obispu Pelayu pa neutralizar a los
criminales. En 1125 gobernaba Tinéu el conde Suariu, alférez
real con xurisdiición dende la Cabruñana dica'l ríu Eo. L'anu
1222 firmóu'l rei Alfonsu IX, de pasu por Oubona, l'afamáu
privilexu sobro'l percorríu de pelegrinos xacobeos, obligando a
estos a pasar por Tinéu nu sou camín dende San Salvador
d'Uviéu a Santiagu.
Yá
en mayu de 1277 firmóuse en La Espina una "carta
d'harmandá" ente los conceyos d'Avilés ya las
puelas de Pravia, Gráu, Salas, Somiedu, Valdes, Tinéu, Cangas
ya Ayande, pa defensa d'intereses comunitarios. L'anu 1295 el
rei Fernando IV confirma privilexos a del.los conceyos, ente
el.los Tinéu,
polos disturbios qu'houbo entrín el rei siguía na
minoria d'edá. Una donación real de 1369 ia compensada por
Enrique III, devolviendo a la corona las vil.las de Tinéu,
Cangas ya Ayande. En 1428 quixo Diegu Fernández de Quiñones,
primeiru conde de L.luna, el condáu de Cangas ya Tinéu, ensin
algamalu; ya en 1434 foi concedíu esti condáu al cabal.leiru
francés Armagnac.
|
Despuéis
de l.longos pleitos, en 1533 declaróuse que Tinéu
pertenecía a la Corona, quedando l.libre de tou señoríu. En
1579 redimese'l coutu de Bárzana, axuntándolu a la Corona.
En 1827 axúntanse a esti municipiu los coutos d'Oubona ya
Sangoñéu (dambos los dous con Ayuntamientu en 1744); ya'l de
Mirayu, tamién con Ayuntamientu en 1821. La data de
constitución del municipiu de Tinéu ia anterior, de
cualaquier manera, al anu 1115. Anguano comprende 44
parroquias ya fiyuelas de parroquia; ya tradicionalmente
dividíuse'l conceyu (dende'l sieglu XVII ou seique anantias)
en cuatru cuartos, que son: el Cuartu Tinéu, nu oriente; el
de Mirayu, al oucidente; el Cuartu los Val.les, al norte; ya'l
de La Riera, al sur, con capitalidades respectivas na propia
vil.la capital del conceyu, en Xera, en Navelgas, ya en Tuña,
que coinciden conos actuales distritos méigos. |
|