Chapitro I

 

 

Kande me evis sis yari, me vidis belega imajo en libro pri la Virga Foresto, di qua titulo esis “Vivita Rakonti”. Ta imajo montris boao glutonta bestio. Yen kopiuro de la imajo :

 

 

  

En la libro onu povis lektar : “La boai glutas integra la kaptita animali, sen mastikar oli. Seque la boai quiete dormas senmova dum la sismonata digestado”.

Do me multe meditis pri la aventuri en la junglo, e samatempe me sucesis krear mea unesma desegnuro per kolorkrayono. Olu esis mea desegnuro numero un, ed olu esis tale :

 

 

Me montris mea chefa verko a la adulti e me questionis a li ka mea desegnuro pavorigis li. La respondo de li a me esis : “Pro quo chapelo pavorigus ni ?”

Ma mea desegnuro ne montris chapelo ma boao qua digestas elefanto. Lore me desegnis la kontenajo di la serpento boao por komprenigar la adulti, nam li sempre bezonas klarigi. Yen quale aspektis mea desegnuro numero du :

 

 

La adulti konsilis a me ne plus desegnar boai (nek olia kontenajo nek olia extera aspekto) e prefere interesar pri geografio, historio, kalkulo e gramatiko. Takauze, evante nur sis yari, me abandonis ecelanta piktisto-kariero, deskurajigita pro la nesuceso de mea desegnuri numero un e du. La adulti nulatempe komprenas tote omno sen helpo, ed esas tre jenanta laboro por la pueri sempre klarigar omno a la adulti.

Do me mustis selektar altra mestiero e me lernis pilotar aeroplani. Me flugis tra la maxim granda parto di la mondo, e me tote konsentas ke la geografio esis tre utila a me. Pro mea savo geografiala me rapide e facile distingas regardete Chinia de Arizona. To tre multe helpas kaze ke onu perdesas dum voyajo en obskura nokto.

Tale, dum mea vivo, me relatis a multa serioza personi e me vivis multatempe kun adulti. Do me proxime vidis li, ma to poke favorigis mea opiniono pri li.

Kande me renkontris ula persono qua aspektis inteligenta, lore me montris a lu mea desegnuro numero un, olquan me sempre konservis. Tale me intencis savar ka lu esis komprenema, ma sempre onu respondis a me: “To esas chapelo”. Lore me ne parolis a lu pri boai, nek pri Virga Foresto, nek pri steli. Me obliviis mea mondo e me parolis a lu pri lua mondo : pri bridge, pri golfo, pri politiko e pri kravati. E la adulto esis ya kontenta pro konocar persono tante racionoza.