raiceiros.org

Coa asistencia de máis dun cento de persoas, o martes 29 de xaneiro do 2008 ás 20.30 horas o Teatro Principal da Estrada acolleu a presentación da guía 'O Val do Ulla. Unha comarca natural', publicada por Raiceiros. Esta presentación dedicouse especialmente por Raiceiros, o Concello da Estrada e o Centro de Iniciativas Turísticas da Estrada a homenaxear a Andrés Tarrío Barreiro, un dos autores do libro, natural da parroquia de San Miguel de Cora dese concello, quen finou o pasado 26 de marzo de 2007.

A guía xa se presentara o 15 de abril do 2007, coincidindo coa XXVII edición da Exaltación do Viño da Ulla, na parroquia vedresa de San Miguel de Sarandón. O xoves 13 de decembro a Libreria O Trasno Viaxeiro de Cacheiras (Teo) acolleu a segunda presentación.

O libro ve a luz tras anos de investigacións e reportaxes fotográficas realizadas polos seus autores: Henrique e Xerardo Neira Pereira, Andrés Tarrío Barreiro, Gerardo Albela González, Darío Janeiro Pereira e José Manuel Vilas Álvarez. Trátase dunha guía na que se mostra a riqueza do patrimonio natural, histórico e cultural das terras da Ulla, encamiñada a proporcionar un mellor coñecemento espazo-temporal e vivencial da bisbarra da Ulla, particularizada nos concellos de Boqueixón, Vedra, Teo e A Estrada. O libro naceu a partir do contido creado para a web www.valdoulla.com, comezada en decembro do 1997 por varios dos autores para dar a coñecer esta comarca natural do curso medio do río Ulla, que recibe os nomes de A Ulla ou O Ulla.

A guía xa está á venda en Vedra en Casa Albela (San Mamede de Ribadulla), Taberna do Ferrador (San Miguel de Sarandón), Casa dos Peóns (San Pedro de Vilanova), en Teo na Librería O Trasno Viaxeiro (Cacheiras), en Santiago nas librerías Gallaecia Liber, Couceiro e Follas Novas e na Estrada na Librería Faro.

Pódese solicitar máis información sobre a publicación a raiceiros@yahoo.es

Raiceiros, na xornada de interculturalidade

Representantes da Asociación Raiceiros participaron o pasado 26 de outubro en Santiago na xornada 'A interculturalidade, o novo itinerario cultural da mocidade', organizada pola Dirección Xeral de Xuventude da Xunta de Galicia, dentro dos actos conmemorativos do 20 aniversario da declaración do Camiño de Santiago como primeiro itinerario cultural europeo. Raiceiros mostrou como se desenvolveu o seu proxecto sobre a requinta da Ulla e a súa vinculación co Camiño, posible vía de chegada a Galicia da frauta en cuxo deseño se baseou a requinta.

Ponte do Gundián sobre o río Ulla. Foto: Mougán

Proxecto Gundián